Ný Aðgerðaáætlun Nice fyrir hafið, sem yfir 170 ríkisstjórnir samþykktu, undirstrikaði „nauðsynlegt hlutverk [hafsins] í að draga úr skaðlegum áhrifum loftslagsbreytinga“ og tók skýrt fram að „aðgerðir í málefnum hafsins verða að byggjast á bestu tiltæku vísindum og þekkingu.“ Áætlunin styður einnig „nýjar vísindarannsóknir til að takast á við þær fjölmörgu áskoranir sem hafið stendur frammi fyrir.“

Ráðstefnan einkenndist af sterkri evrópskri forystu í að beita vísindamiðuðum nálgunum. Þrátt fyrir óvissu á heimsvísu lögðu ESB-ríki ítrekað áherslu á að traust stjórnun og nýting hafs verði að byggjast á nákvæmum vísindarannsóknum og alþjóðlegu samstarfi. Umhverfis-, orku- og loftslagsráðherra Íslands tók afgerandi undir þessa forgangsröðun, enda hefur Ísland verið á meðal fremstu þjóða í að byggja sjálfbæra nýtingu hafsins á vísindum.

ESB kynnti megináherslur sínar og heitir 1 milljarði evra til stuðnings þeim, þar af var þriðjungur sérstaklega ætlaður til rannsókna og vísindaverkefna. Ursula von der Leyen, forseti framkvæmdastjórnar Evrópusambandsins, sagði: „Þekking er eitt öflugasta verkfærið til verndunar hafsins... Markmið okkar er að endurvekja 20% af evrópskum sjávarvistkerfum fyrir árið 2030.“

Fyrir Ísland eru margvísleg tækifæri til að leiða öflugt vísindastarf í málefnum hafsins og byggja upp mikilvæga þekkingu á þessu sviði. Við hjá Röst Sjávarrannsóknasetri erum staðráðin í að byggja á þeim framförum sem náðust á UNOC með því að halda áfram að stunda mikilvægar grunnrannsóknir og vísindastarf sem tengist hafrannsóknum og loftlagsmálum.